LAGU-LAGU RANDAI

BAB I.

Manolah niniak yo dengan mamak

Sarato urang nan cadiak pandai 2x

Rila jo ma’af yo kami pintak

Sagalo kami yo anak randai 2x.

Ampun baribu yo kali ampun
Pado panonton urang nan banyak 2x 
Jari sapuluah yo kami susun

Rila jo ma’af nan kami pintak 2x.

Balai-balai yo sapuluah koto

Bukik barisan nan bakuliliang 2x

Randai kamulai yo bacarito

Tanang panonton nan sakuliliang 2x.

BAB II

Alai-alai tabang ka alai

Tabang jo pipik duo lah tigo 2x

Kabalah lamo tabang kalai

Kini di ulang-ulang pulo 2x.

Tambilang dirumpun lansek

Tasisik di liang lantai 2x

                        Kami lah bilang sado nan dapek

                        Yo nan tingga untuak urang pandai 2x.

Balai-balai yo sapuluah koto

Bukik barisan nan bakuliliang 2x

Randai kamulai yo bacurito

Tanang dunsanak nan sakuliliang 2x.

BAB III

Kami lah datang dari singguling

Lubuk yo alung namo nagarinyo 2x

Pado panonton nan sakuliliang

Tanang dunsanak yo kasadonyo 2x.

                        Kami nan anak mudo matah

                        Ka nan rami ikolah baru 2x

                        Dalam barandai kami kok salah

                        Usah manjadi yo sesuatu 2x.

Pado dunsanak nan basamo

Garah kucikak yo talampau 2x

Ampun sabaleh jo kapalo

Anggap sajo kito bagurau 2x.

BAB IV

Kami barandai sato jo dendang

Kami bamain di tangah medan 2x

Sungguah pun dunia nan kito hadang

Akhirat usah kito lupokan 2x.

                        Mangko baitu katonyo kami

                        Dek dunsanak tolong dangakan 2x

                        Dari hiduik pasti kamati

                        Amal ibadaik usah di lupokan 2x.

Adaik jo sarak usah lupokan

Itu manjadi padoman hiduik 2x

Jan sampai sasek kito di jalan

Jalan agamo nan kito turuik 2x.

BAB V

Seni budaya di minang kabau

Mari basamo kito galak kan 2x

Dek ameh kito lah jadi silau

Loyang jo perak kito lupokan 2x.

                        Minang kabau nagari kito

                        Adaiknyo basandi sarak 2x

                        Samiang jan sampai kito lupo

                        Iman di dado usah bakucak 2x.

Sarak bakato adaik mamakai

Papatah lamo usah lupokan 2x

Jikok hiduik andak salasai

Mari agamo kito tagakkan 2x.

                                                                            Penulis , Agus Ade Putra Tk. Sidi Nan Mulie